جدہ (محمد اکرم اسد) پاک بحریہ کے جہاز پی این ایس ‘حنین’ کے کمانڈر کیپٹن ہارون عزیز نے سعودی عرب میں پاکستان کے سفیر احمد فاروق، میجر جنرل احمد بن علی الدبئیس، کے اعزاز میں عشائیہ دیا۔
قائد المنتقہ الغربیہ (مغربی ریجن کمانڈر)، ریئر ایڈمرل منصور بن سعود الجیاد، قائد الاستول الغربیہ (مغربی بیڑے کے کمانڈر)، پاکستان کے قونصل جنرل خالد ماجد، پاکستانی سفارتکار اور کمیونٹی نے شرکت کی۔ جدہ اسلامی بندرگاہ پر جہاز میں مہمانوں کا خیرمقدم کرتے ہوئے کیپٹن ہارون عزیز نے سعودی عرب میں پاکستان کے سفیر احمد فاروق، سعودی عسکری رہنماؤں اور پاکستان کے قونصل جنرل خالد مجید کا شکریہ ادا کیا کہ ان کے پورے دورے کے دوران عملے کی بہترین مہمان نوازی کی گئی۔
سعودی عرب میں پاکستان کے سفیر احمد فاروق نے کہا کہ پی این ایس حنین کے دورہ سعودی عرب سے پاکستان اور سعودی عرب کے درمیان دوستی کے رشتے مزید مضبوط ہوں گے۔ انہوں نے کہا کہ پاکستان اور سعودی عرب کی شراکت داری پاکستان اور سعودی عرب کے درمیان دیرینہ، گہری جڑوں والی دوستی کی بنیاد پر استوار ہے، جو حکومتوں سے بڑھ کر عوام سے عوام کے مضبوط روابط تک پھیلی ہوئی ہے۔ تقریب میں سعودی فوجی اور بحری حکام نے بھی بڑی تعداد میں شرکت کی۔ پاکستانی کمیونٹی کے اراکین اور پیشہ ور افراد کو پاک بحریہ کے جہاز حنین کی مختلف صلاحیتوں اور پہلوؤں کے بارے میں آگاہ کیا گیا۔
پی این ایس حنین نے اپنا پہلا سفر رومانیہ سے شروع کیا، یہ ایک نیا کمیشنڈ جہاز ہے اور پاکستان کے راستے پر ہے جہاں اسے باقاعدہ طور پر پاک بحریہ میں شامل کیا جائے گا۔ تقریب کا اختتام کیک کاٹنے اور عشائیہ کے ساتھ ہوا۔
